Gisimba ang Sto. Nino bisan haing dapit sa nasud. Ang imahen sa Balaang Bata giyukboan ug gitahod isip dagway sa Batang Hesus.

Usa sa mga dapit diin anaa ang imahen sa Sto. Niño ug gihalaran mao ang Daram, usa ka isla sa Eastern Samar. Apan dili simbahan ang nahimutangan sa maong imahen o kaha kapilya kundili usa ka bato tunga-tunga sa dagat.

Ang mga mananagat sa maong lugar, sa dili pa sila molahos og adto sa lawod aron sa pagpangisda, mohapit gyud sa bato, nga nahimutang mga 100 metros gikan sa pantalan, ug mobilin og kwarta isip halad sa pagtuo nga kini mobalik ra man sab kanila pinaagi sa maayong kuha.

Giingon nga mismong ang simbahan maoy nagbutang sa imahen sa Sto. Niño aron pagbaylo sa pagtahod sa mga tawo gikan sa bato adto na sa Sto. Niño. Ang mosunod maoy sugilanon kabahin sa bato, nga napasa-pasa gikan sa kakaraanan ngadto sa atong panahon.

Matod pa sa mga katiguwangan sa Daram, sa sinugdanan ang bato usa ka dakong barko nga naglawig ug nihunong sa may isla.

Giingong ang barko adunay daghan kaayong mga tawo nga naglipaylipay sulod sa barko. Samtang sila nagsadya, aduna say iring ug iro nga nagginukoray.

Wala nakabantay ang mga tawo sa barko nga naglain diay ang panahon niadtong higayona.  Samtang nagginukoray ang iring ug ang iro, giingong gilipakan ang tibuok barko ug nahimong dakong bato.

Dugang pa nila, pagkahuman sa panghitabo, adunay dako nga bitin nga nakita nga nagbantay sa bato.

Sa ngadto-ngadto, ang mga mananagat mohapit sa bato, nga nahimo nang daw ampoanan alang sa luwas nga pagpangisda, hinungdan nga gibutangan sa simbahan og imahen sa Sto. Niño.

Ang kwarta nga halad sa mga mangingisda nga matigom adto mopaingon sa simbahan.

Karon, ang mga taga-Daram mismo maoy nag-atiman sa kalimpyo ug kahapsay sa bato, nga tuyong adtuon sa mga dayo ug turista aron adto maligo.

Dili kuyaw sawom-sawoman ang bato kay diretso lawom ug walay laing mga bato sa duol.